ໃນວັນທີ 23 ພະຈິກ 2023 ຜ່ານມານີ້, ພະແນກຈະລາຈອນ ປກສ ແຂວງຜົ້ງສາລີ, ໄດ້ລົງໂຄສະນາປູກຈິດສຳນຶກຄວາມປອດໄພທາງຫຼວງ ຢູ່ໂຮງຮຽນສູນວິຊາຊີບ-ຊົນເຜົ່າເມືອງບຸນເໜືອ, ແຂວງຜົ້ງສາລີ. ເປັນກຽດເຂົ້າຮ່ວມຂອງ ທ່ານ ສົມພານ ວີໄລຈິດ ອຳນວຍການໂຮງຮຽນສູນວິຊາຊີບ-ຊົນເຜົ່າ, ທ່ານ ຮອ ສົມເພັດ ຈັນທະນິດ ຮອງຫົວໜ້າພະແນກຈະລາຈອນ ປກສ ແຂວງ, ມີຄູອາຈານ ແລະ ນ້ອງໆນັກຮຽນ-ນັກສຶກສາເຂົ້າຮ່ວມ 235 ຄົນ.
ໃນພິທີ ຮອ ຈັນສະໝອນ ແກ້ວປະເສີດ ຫົວໜ້າໜ່ວຍງານໂຄສະນາ, ໄດ້ສະເໜີຈຸດປະສົງໃນການລົງໂຄສະນາເຜີຍແຜ່ລະບຽບການສັນຈອນໃນຄັ້ງນີ້, ເພື່ອເຮັດໃຫ້ຄູ-ອາຈານ, ນັກຮຽນ-ນັກສຶກສາ ໄດ້ຮັບຮູ້ເຂົ້າໃຈເຖິງລະບຽບການສັນຈອນ
ເພື່ອເຮັດໃຫ້ນັກຂັບຂີ່ມີສະຕິໃນການໃຊ້ລົດໃຊ້ຖະໜົນ, ພ້ອມກັນປະຕິບັດກົດຈະລາຈອນຢ່າງເຂັ້ມງວດ, ມີສ່ວນຮ່ວມໃນການໂຄສະນາຊ່ວຍເຈົ້າໜ້າທີ່, ເພື່ອເຮັດໃຫ້ການສົນຈອນທາງບົກມີຄວາມເປັນລະບຽບຮຽບຮ້ອຍ ແລະ ມີຄວາມປອດໄພ.
ຂ່າວ: ເພັງຕຸລາ.
