ໃນຄັ້ງວັນທີ 29 ພຶດສະພາ 2023 ທາງເຈົ້າໜ້າທີ່ຕຳຫຼວດຈະລາຈອນ ເມືອງປາກຊ່ອງ, ແຂວງຈຳປາສັກ ໄດ້ຮັບແຈ້ງວ່າມີ ອຸບປະຕິເຫດ ລົດກະບະຮຸນໄດ ຕຳລົດຈັກ ແລ້ວຫຼົບໜີຈາກສະຖານທີ່ເກີດເຫດ ພາຍຫຼັງເກີດເຫດໄດ້ມີປ້າຍທະບຽນ ກນ 5286 ກຳແພງນະຄອນ ເຊິ່ງແມ່ນປ້າຍທະບຽນຂອງລົດກະບະຮຸນໄດຄັນເກີດເຫດ ໄດ້ຕົກຢູ່ຈຸດເກີດເຫດ ຂອບເຂດບ້ານຫຼັກ 48, ເມືອງປາກຊ່ອງ, ແຂວງຈຳປາສັກ.
ພາຍຫຼັງທີ່ເຈົ້າໜ້າທີ່ຕຳຫຼວດຈະລາຈອນ ເມືອງປາກຊ່ອງ ຮູ້ຂໍ້ມູນເບື້ອງຕົ້ນກໍ່ໄດ້ຮີບຮ້ອນ ຄົ້ນຫາຂໍ້ມູນເພີ່ມເຕີມ ພ້ອມທັງອອກຕິດຕາມເປົ້າໝາຍ ຕາມຫຼັກການວິຊາສະເພາະ.
ຕົກມາຮອດວັນທີ 01 ມິຖຸນາ 2023 ເຈົ້າໜ້າທີ່ຕຳຫຼວດຈະລາຈອນ ປກສ ເມືອງປາກຊ່ອງ ໄດ້ສົມທົບກັບ ປກສ ເມືອງ ສະໜາມໄຊ ແຂວງອັດຕະປື ໄດ້ກັກຕົວ ທ້າວ ຫຳ ພົມມະຈັນ, ອາຍຸ 29 ປີ, ສັນຊາດລາວ, ອາຊີບປະຊາວສວນ, ບ້ານໂຄກກ່ອງ, ເມືອງສະໜາມໄຊ, ແຂວງອັດຕະປື ໃນຂໍ້ຫາ ເກີດອຸບປະຕິເຫດແລ້ວ ເອົາຕົວຫຼົບໜີຈາກສະຖານທີ່ເກີດເຫດ ໃນຄັ້ງວັນທີ 29 ພຶດສະພາ 2023 ຢູ່ຂອບເຂດບ້ານຫຼັກ 48, ເມືອງປາກຊ່ອງ, ແຂວງຈຳປາສັກ.
ຂ່າວ: ເພັງຕຸລາ.
