ວັນທີ 28 ຕຸລາ 2023 ບໍລິສັດ ຄິງເບເວີເລດ ຈຳກັດ ໄດ້ນຳເອົາເຄື່ອງດື່ມຈຳນວນຫຼາຍແກັດ ລວມມູນຄ່າ 3.000.000 ກວ່າກີບ ເຊິ່ງເປັນຜະລິດຕະພັນທີ່ທາງບໍລິສັດຜະລິດ ແລະ ຈັດຈຳໜ່າຍທີ່ ສປປ ລາວ ມອບໃຫ້ເຈົ້າໜ້າທີ່ຕຳຫຼວດຈະລາຈອນທີ່ກຳລັງປະຕິບັດໜ້າທີ່ຈັດສັນຄວາມເປັນລະບຽບຮຽບຮ້ອຍ, ລະບາຍການສັນຈອນຢ່າງເຂັ້ມງວດ ເພື່ອຮັບປະກັນໃຫ້ມວນຊົນທີ່ເຂົ້າມາທ່ຽວພາຍໃນງານມີຄວາມສະດວກ.
ຕາງໜ້າກ່າວມອບໂດຍ ທ່ານ ສໍລະວິດ ໃໝ່ເມທີ ປະທານບໍລິສັດ ຄິງເບເວີເລດ ຈຳກັດ, ຕາງໜ້າກ່າວຮັບໂດຍ ພັທ ອຸໄລວັນ ລາດຊະວົງ ຫົວໜ້າກອງຕຳຫຼວດຈະລາຈອນເມືອງຈັນທະບູລີ ນະຄອນຫຼວງວຽງຈັນ.
ທ່ານ ສໍລະວິດ ໃໝ່ເມທີ ປະທານບໍລິສັດ ຄິງເບເວີເລດ ຈຳກັດ ກ່າວວ່າ: ຮູ້ສຶກເປັນກຽດຫຼາຍທີ່ໄດ້ມີສ່ວນຮ່ວມໃນການຊຸກຍູ້ວຽກງານປ້ອງກັນຄວາມສະຫງົບ ໂດຍສະເພາະແມ່ນວຽກງານວິຊາສະເພາະຂອງຕຳຫຼວດຈະລາຈອນທີ່ເສຍສະລະເຫື່ອແຮງເຂົ້າໃນການປະຕິບັດວຽກງານວິຊາສະເພາະໃນການຈັດສັນຄວາມເປັນລະບຽບຮຽບຮ້ອຍຕາມທ້ອງຖະໜົນ ເພື່ອໃຫ້ງານບຸນຊ່ວງເຮືອມີຄວາມເປັນລະບຽບຮຽບຮ້ອຍ.
ໂອກາດນີ້, ພັທ ອຸໄລວັນ ລາດຊະວົງ ຫົວໜ້າກອງຕຳຫຼວດຈະລາຈອນເມືອງຈັນທະບູລີ ໄດ້ສະແດງຄວາມຂອບອົກຂອບໃຈເປັນຢ່າງສູງຕໍ່ການປະກອບສ່ວນຊຸກຍູ້ໃນຄັ້ງນີ້ ເຊິ່ງຖືວ່າເປັນຂວັນກຳລັງໃຈໜຶ່ງທີ່ມອບໃຫ້ເຈົ້າໜ້າທີ່-ທີ່ເອົາໃຈໃສ່ປະຕິບັດວຽກງານຢ່າງມີຄວາມຮັບຜິດຊອບສູງ.
