ທ່ານ ພັທ ພົມມະລາ ບົວລະພາ ຫົວໜ້າກອງບັນຊາການ ປກສ ເມືອງທ່າແຂກ ທັງເປັນຄະນະຊີ້ນຳປ້ອງກັນງານບຸນອອກພັນສາ ແລະ ຊ່ວງເຮືອ ເມືອງທ່າແຂກ ປະຈຳປີ 2023 ລາຍງານກ່ຽວກັບການຈັດວາງກໍາລັງເຈົ້າໜ້າທີ່ປ້ອງກັນງານບຸນ ໃນວັນທີ 27 ຕຸລາ 2023
ໃຫ້ຮູ້ວ່າ: ເພື່ອຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍໃນບໍລິເວນງານບຸນ – ນອກງານບຸນ ກອງບັນຊາການ ປກສ ເມືອງແມ່ນໄດ້ຈັດແບ່ງກຳລັງ ເຊິ່ງປະກອບມີ ໜ່ວຍງານປ້ອງກັນທົ່ວໄປ ຈຳນວນ 13 ໜ່ວຍ ແລະ ໜ່ວຍງານຈັດສັນຄວາມເປັນລະບຽບຮຽບຮ້ອຍຂອງຍານພາຫະນະ 13 ໜ່ວຍ ລົງປະຈຳແຕ່ລະຈຸດສະຖານທີ່ສຳຄັນຕ່າງໆເປັນຕົ້ນ: ຈຸດສາມແຍກ, ສີ່ແຍກ ຫຼື ຕາມຈຸດຊ່ອງວ່າງຕ່າງໆ ໃນຂອບເຂດ ແລະ ສະຖານທີ່ຈັດງານ ເພື່ອຮັບປະກັນເຮັດໃຫ້ງານບຸນປະເພນີອອກພັນສາປະວໍຣະນາປະ ຈຳປີ 2023
ໃຫ້ມີຄວາມຄວາມປອດໄພ ໃຫ້ແກ່ການນຳພັກ – ລັດ, ນັກທ່ອງທ່ຽວ, ນັກທຸລະກິດ, ພໍ່ຄ້າຊາວຂາຍ ແລະ ພໍ່ແມ່ປະຊາຊົນບັນດາເຜົ່າ ແນໃສ່ເຮັດໃຫ້ງານດັ່ງກ່າວເຕັມໄປດ້ວຍຄວາມເບີກບານມ່ວນຊື່ນ ແລະ ຮັກສາໄດ້ຮີດຄອງປະເພນີອັນດີງາມຂອງຊາດ ກໍ່ຄືຂອງທ້ອງຖິ່ນ ໄວ້ຢູ່ຄູ່ກັບສັງຄົມລາວຕະຫຼອດໄປ.
ໂອກາດນີ້ ທ່ານຫົວໜ້າ ປກສ ເມືອງທ່າແຂກ ຍັງໄດ້ຮຽກຮ້ອງມາຍັງການຈັດຕັ້ງ, ພໍ່ແມ່ປະຊາຊົນ ແລະ ທຸກພາກສ່ວນໃນສັງຄົມ ທີ່ມາທ່ຽວໃນງານບຸນ ຈົ່ງມີສະຕິລະວັງຕົວ ແລະ ປະກອບສ່ວນເປັນຫູເປັນຕາໃນການຕິດຕາມກຸ່ມຄົນທີ່ບໍ່ຫວັງດີ ຖ້າພົບເຫັນແມ່ນໃຫ້ຮີບຮ້ອນລາຍງານຕໍ່ເຈົ້າໜ້າທີ່ ເພື່ອຕ້ານ, ສະກັດກັ້ນໄດ້ທັນເວລາ ແລະ ພ້ອມກັນປະຕິບັດຕາມ ຂໍ້ກຳນົດ, ກົດລະບຽບໃນການທ່ຽວງານ ທີ່ທາງຄະນະກຳມະການຈັດງານວາງອອກ ເພື່ອຄວາມສະຫງົບ ແລະ ປອດໄພ ຕະຫຼອດການຈັດງານ.
