ໃນຄັ້ງວັນທີ 09 ພະຈິກ 2023 ເຈົ້າໜ້າທີ່ກອງຈະລາຈອນ ປກສ ເມືອງນາໝໍ້ ໄດ້ສຶກສາອົບຮົມກ່າວເຕືອນ ຜູ້ທີ່ລະເມີດກົດລະບຽບຈະລາຈອນ ເປັນຕົ້ນແມ່ນການດັດແປງສະພາບເຕັກນິກລົດ ຈໍານວນ 10 ຄົນ, ພ້ອມກັກພາຫະນະດັດແປງສະພາບ ຈໍານວນ 16 ຄັນ ໂດຍມີພະນັກງານຂັ້ນພະແນກ ພ້ອມດ້ວຍເຈົ້າໜ້າທີ່ ທີ່ກ່ຽວຂ້ອງ, ມີພໍ່ແມ່ຜູ້ປົກຄອງ ແລະ ພາກສ່ວນທີ່ຝືນຕໍ່ກົດລະບຽບຈະລາຈອນເຂົ້າຮ່ວມຮັບຟັງ.
ສະຫາຍ ພັຕ ສີວອນ ຈັນພາວົງ ຫົວໜ້າພະແນກຕໍາຫຼວດ ປກສ ເມືອງນາໝໍ້ ໄດ້ໃຫ້ຮູ້ວ່າ: ຕະຫຼອດໄລຍະທີ່ຜ່ານມາ ເຈົ້າໜ້າທີ່ວິຊາສະເພາະໄດ້ສຸ່ມໃສ ເຄື່ອນໄຫວລົງໂຄສະນາເຜີຍແຜ ບັນດານິຕິກໍາ ກ່ຽວກັບຂໍ້ກໍານົດກົດລະບຽບການສັນຈອນ ໃນບັນດາໂຮງຮຽນ ແລະ ບ້ານຕ່າງໆ ຢ່າງເປັນປົກກະຕິ
ແຕ່ຍັງມີກຸ່ມຄົນຈໍານວນໜື່ງ ຍັງສືບຕໍ່ເຄື່ອນໄຫວລະເມີດຕໍ່ລະບຽບ ທີ່ໄດ້ກໍານົດພາເກີດມີບັນຫາຫຍໍ້ທໍ້ດ້ວຍຫຼາຍກໍລະນີເຊັ່ນ: ມີການດັດແປງສະພາບເຕັກນິກລົດ ພາໃຫ້ເກີດມີຄວາມສ່ຽງຕໍ່ການເກີດອຸບັດເຫດ, ໃສ່ຢາງລໍ້ນ້ອຍເກີນຂະໜາດ, ດັດແປງທໍ້ໃສ່ສຽງດັງກວນເມືອງ, ສ້າງຄວາມລໍາຄານໃຫ້ແກ່ສັງຄົມ ແລະ ອື່ນອື່ນທີ່ບໍ່ປອດໄພ ໃນນີ້ໄດ້ກວດກາ ແລະ ກັກພາຫະນະລົດຈັກ ດັດແປງສະພາບເຕັກນິກຈໍານວນ 16 ຄັນ, ພ້ອມທັງພາກສ່ວນທີ່ລະເມີດມາດໍາເນີນສຶກສາອົບຮົມກ່າວເຕື່ອນ ວາງມາດຕະການຕໍ່ພາກສ່ວນດັ່ງກ່າວ ໃຫ້ປ່ຽນແປງສະພາບເຕັກນິກລົດ ໃຫ້ເປັນສະພາບປົກກະຕິ.
