ຕາມການລາຍງານຂອງພະແນກຄຸ້ມຄອງກວດກາທາງດ່ວນໃຫ້ຮູ້ວ່າ ເວລາ 18 ໂມງ 00 ນາທີ, ຂອງວັນທີ 19 ມີນາ 2024, ໄດ້ມີອຸບປະຕິເຫດ ລົດຈິບໄຟຟ້າ, ຍີ່ຫໍ້ VOLKSWAGEN, ໝາຍເລກທະບຽນ ຣມ 3113 ກຳແພງນະຄອນ ເສຍຫຼັກຕຳຮາວກັ້ນຂອບທາງ ແລ້ວໄປເອົາຮາວກັ້ນຄູກາງທາງ, ເກີດຂື້ນຢູ່ເສັ້ນທາງດ່ວນຂອບເຂດບ້ານຫຼັກ52, ເມືອງໂພນໂຮງ, ແຂວງວຽງຈັນ.
ຜ່ານສືບສວນ-ສອບສວນເບື້ອງຕົ້ນຈຶ່ງໄດ້ຮູ້ວ່າ ລົດຈິບ ໝາຍເລກທະບຽນ ຣຫ 8886 ກຳແພງນະຄອນ, ຂັບຂີ່ໂດຍ ທ້າວ ສຸພາລັກ ພະໄຊສົມບັດ, ອາຍຸ 26 ປີ, ສັນຊາດລາວ, ອາຊີບພະນັກງານ, ຢູ່ບ້ານສີບຸນເຮືອງທ່າ, ເມືອງສີໂຄດຕະບອງ, ນະຄອນຫຼວງວຽງຈັນ, ໂດຍໃນມື້ເກີດເຫດຜູ້ກ່ຽວໄດ້ຂັບຂີ່ລົດອອກມາແຕ່ ເມືອງວັງວຽງຜ່ານເສັ້ນທາງດ່ວນ ຈຸດປະສົງຈະມຸ້ງໜ້າໄປນະຄອນຫຼວງວຽງຈັນ ແຕ່ເດີນທາງມາຮອດເຂດບ້ານຫຼັກ 52, ໄດ້ເກີດອຸບປະຕິເຫດ ລົດເສຍຫຼັກແລ້ວໄປຕຳເອົາຮາວກັ້ນຂອບທາງດ່ວນ ຈາກນັ້ນໄປຕຳເອົາຮາວກັ້ນຄູກາງທາງ ເຮັດໃຫ້ພາຫະນະເປ່ເພສົມຄວນ 01 ຄັນ, ໂຊກດີຜູ້ຂັບຂີ່ແມ່ນບໍ່ໄດ້ຮັບບາດເຈັບ, ສ່ວນສາເຫດທີ່ເກີດອຸບປະຕິເຫດທີ່ແທ້ຈີງ ຍັງຢູ່ໃນຂັ້ນຕອນການສືບສວນ-ສອບສວນ ລະອຽດເພີ່ມເຕີມອີກເທື່ອໜື່ງ.
ດ້ວຍຄວາມເປັນຫ່ວງຈາກ ກົມຕຳຫຼວດຈະລາຈອນ ຂໍຮຽກຮ້ອງມາຍັງພໍ່ແມ່, ປະຊາຊົນ, ຜູ້ໃຊ້ລົດໃຊ້ຖະໜົນ ໃຫ້ມີສະຕິລະມັດລະວັງ ເຄົາລົບກົດຈະລາຈອນ ໂດຍສະເພາະຜູ້ທີ່ນຳໃຊ້ເສັ້ນທາງດ່ວນໃຫ້ປະຕິບັດຕາມປ້າຍເຕືອນ ແລະ ຫ້າມໃຊ້ຄວາມໄວເກີນປ້າຍກຳນົດ ເພາະອາດມີຄວາມສ່ຽງພາໃຫ້ເກີດອຸບປະຕິເຫດ.
ຂ່າວ: ເພັງຕຸລາ.
