ຄະນະທີມງານພະແນກຕໍາຫຼວດຈະລາຈອນກອງບັນຊາການ ປກສ ແຂວງອຸດົມໄຊ ໄດ້ສົມທົບກັບທາງ ພະແນກ ຍທຂ ແຂວງ ອຸດົມໄຊ ລົງໂຄສະນາເຜີຍແຜ່ຂໍ້ກຳນົດກົດລະບຽບຈະລາຈອນ ຢູ່ທີ່ໂຮງຮຽນ ມສ ເມືອງປາກແບງ, ມສ ເມືອງແບງ ແລະ ມສ ເມືອງຮຸນ ແຂວງອຸດົມໄຊ ໃນວັນທີ 17-19 ຕຸລາທີ່ 2023 ຜ່ານມານີ້້.
ເພື່ອເຮັດໃຫ້ນັກຮຽນໄດ້ເຊື່ອມຊຶມກໍາແໜ້ນ ແລະ ຮັບຮູ້ເຂົ້າໃຈແຈ້ງຕໍ່ບັນດາຂໍ້ກໍານົດກົດລະບຽບໃນການສັນຈອນໄປ-ມາ, ການຂັບຂີຍານພາຫະນະທຸກປະເພດໃຫ້ຖືກຕ້ອງຕາມຂໍ້ກໍານົດ
ແລະ ທັງເປັນການສະກັດກັ້ນແກ້ໄຂບັນຫາອຸບປະຕິເຫດ ໃຫ້ຫຼຸດໜ້ອຍຖອຍລົງ ແລະ ເຮັດໃຫ້ສະພາບການສັນຈອນຕາມທອງຖະໜົນມີຄວາມເປັນລະບຽບຮຽບຮ້ອຍດີ.
ໄດ້ມີການອະທິບາຍ ກົດລະບຽບການສັນຈອນ, ບັນດາປ້າຍສັນຍານເຕືອນ, ເຄື່່ອງໝາຍ, ເຕັກນິກການຂັບຂີ່ປອດໄພ, ພ້ອມທັງຍົກໃຫ້ເຫັນບັນດາມາດຕະການຕ່າງໆຕໍ່ຜູ້ລະເມີດ ທີ່ຢູ່ໃນ ດຳລັດ ເລກທີ 615/ລບ ແລະ ດຳລັດ ເລກທີ 568/ລບ
ພ້ອມນີ້ກໍເພື່ອໃຫ້ນ້ອງໆນັກຮຽນ ມີສະຕິໃນການຂັບຂີ່ຍານພາຫະນະ ເຄົາລົບກົດລະບຽບຈະລາຈອນ, ຮູ້ຈັກໃຫ້ກຽດເຊິ່ງກັນ ແລະກັນ ບໍ່ແລ່ນລົດໄວເກີນກໍານົດ, ບໍ່ດື່ມສິ່ງມຶນເມົາແລ້ວຂັບຂີ່ພາຫະນະ ເພື່ອຫຼີກລ່ຽງບັນຫາການເກີດອຸບປະຕິເຫດ ຖ້າຫາກເກີດອຸບັດຕິເຫດແລ້ວຈະເຮັດໃຫ້ເສຍທັງເງິນ, ເສຍເວລາ, ເສຍອານາຄົດ ແລະ ຮ້າຍແຮງໄປກ່ວານັ້ນເຮັດໃຫ້ເສຍຊີວິດ.
ຂ່າວ: ເພັງຕຸລາ.
