ກົມຕຳຫຼວດຈະລາຈອນ ກົມໃຫຍ່ຕໍາຫຼວດ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ໄດ້ຈັດກອງປະຊຸມແລກປ່ຽນບົດຮຽນວຽກງານວິຊາສະເພາະ ຮ່ວມກັບ ກົມຕຳຫຼວດຈະລາຈອນ ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ ໃນວັນທີ 21 ທັນວາ 2023, ເປັນປະທານໂດຍ ທ່ານ ພັນເອກ ກົງສີ ສຸວັນນະຕຸ້ມ ຫົວໜ້າກົມຕໍາຫຼວດຈະລາຈອນ ແຫ່ງ ສປປ ລາວ ແລະ ທ່ານ ພົນຈັດຕະວາ ຫງຽນ ວັນ ຈຸງ ຫົວໜ້າກົມຕຳຫຼວດຈະລາຈອນ ແຫ່ງ ສສ ຫວຽດນາມ, ມີຄະນະຜູ້ແທນທັງສອງຝ່າຍເຂົ້າຮ່ວມ.
ທ່ານ ພັນເອກ ກົງສີ ສຸວັນນະຕຸ້ມ ໄດ້ກ່າວວ່າ:
ການປົກປັກຮັກສາຄວາມສະຫງົບ, ຄວາມເປັນລະບຽບຮຽບຮ້ອຍໃນສັງຄົມຂອງພວກເຮົາ ຍັງປະເຊີນໜ້າກັບສິ່ງທ້າທາຍຫຼາຍຢ່າງ ໂດຍສະເພາະແມ່ນ ການລັກລອບຄ້າຂາຍຢາເສບຕິດ, ການຄ້າມະນຸດ, ການປຸ້ນຊັບ-ຊິງຊັບ, ການລັກຊັບ, ການເຄື່ອນໄຫວກະທຳຜິດທາງອາຍາອື່ນໆ, ບັນດາກຸ່ມແກ້ງເຄື່ອນໄຫວທຸລະກິດທີ່ບໍ່ຖືກຕ້ອງຕາມລະບຽບກົດໝາຍ, ການໄລ່ຊອກ-ໄລ່ຈັບຜູ້ກະທຳຜິດແລ້ວເອົາຕົວລົບໜີ, ພວກອາຊະຍາກຳເລົ່ານີ້ ມີເລ່ລ່ຽມວິທີການເຄື່ອນໄຫວຢ່າງເລິກແລບແນບນຽນ, ເປັນກຸ່ມແກ້ງ, ມີເຄືອຂ່າຍ, ລຳລຽງຂົນສົ່ງ, ມີການຈັດຕັ້ງຂ້າມຊາດ, ນຳໃຊ້ເຕັກນິກທັນສະໄໝ ແລະ ມີຄວາມຮຸນແຮງເຂົ້າໃນການກະທຳຜິດ.
ອີກບັນຫາໜຶ່ງ ແມ່ນອຸບັດຕິເຫດຕາມທ້ອງຖະໜົນ ແລະ ແກ້ໄຂການສັນຈອນແອອັດຢູ່ໃນຕົວເມືອງ ເພື່ອແກ້ໄຂບັນຫາດັ່ງກ່າວ, ມັນຮຽກຮ້ອງໃຫ້ສອງກຳລັງຕຳຫຼວດຈະລາຈອນພວກເຮົາ ມີຄວາມຈຳເປັນຕ້ອງໄດ້ສືບຕໍ່ປຶກສາຫາລືຊອກຫາທາງແກ້ໄຂຮ່ວມກັນໃຫ້ມີປະສິດທິຜົນ.
ໃນກອງປະຊຸມ, ຄະນະຜູ້ແທນທັງສອງຝ່າຍ ກໍໄດ້ປືກສາຫາລື ແລະ ແລກປ່ຽນບົດຮຽນນຳກັນ ເພື່ອຮັບປະກັນໃຫ້ແກ່ວຽກງານວິຊາສະເພາະຂອງທັງ 2 ກົມຕໍາຫຼວດຈະລາຈອນ ລາວ ແລະ ຫວຽດນາມ ໃຫ້ໄດ້ຮັບໝາກຜົນດີຂຶ້ນຕາມລະດັບຄາດໝາຍທີ່ວາງໄວ້ ແລະ ທັງສອງຝ່າຍ ກໍໄດ້ພ້ອມກັນແລກປ່ຽນບົດຮຽນ ແລະ ເປັນເອກະພາບກັນມີບັນດາເນື້ອໃນ ດັ່ງນີ້:
ສະເໜີໃຫ້ ກົມຕຳຫຼວດຈະລາຈອນ ສສ ຫວຽດນາມ ຈັດຕັ້ງຝຶກອົບຮົມຝຶກອົບຮົມວຽກງານວິຊາສະເພາະ ຢູ່ ສສ ຫວຽດນາມ ເປັນຕົ້ນ ຄື:
– ວຽກງານຮັກສາຄວາມເປັນລະບຽບຮຽບຮ້ອຍ ແລະ ຄວາມປອດໄພທາງຖະໜົນ
– ວຽກງານໂຄສະນາ
– ວຽກງານສືບສວນ-ສອບສວນ ຄະດີອຸບັດຕິເຫດ
– ວຽກງານຂຶ້ນທະບຽນຍານພາຫະນະ ແລະ ຄຸ້ມຄອງພາຫະນະ
ສ້າງກົນໄກປະສານງານ ລະຫວ່າງ ຕຳຫຼວດຈະລາຈອນ ລາວ-ຫວຽດນາມ ສໍາລັບແຂວງທີ່ມີຊາຍແດນຕິດຈອດ; ເຫັນດີເປັນເອກະພາບຜັດປ່ຽນກັນເປັນເຈົ້າພາບ ຈັດກອງປະຊຸມ 1 ຄັ້ງຕໍ່ປີ ເພື່ອແລກປ່ຽນບົດຮຽນ, ຂໍ້ມູນຂ່າວສານເຊິ່ງກັນແລະກັນ.
ສະເໜີລາຍງານເຂົ້າແຜນການຮ່ວມມື ລະຫວ່າງສອງກະຊວງ ໃນປີ 2024 ຈັດກອງປະຊຸມກ່ຽວກັບ ເນື້ອໃນຄວບຄຸມການນຳໃຊ້ມາດຕະການຕໍ່ນັກຂັບຂີ່ພາຫະນະທີ່ຕິດແຜ່ນປ້າຍທະບຽນລາວ ແຕ່ຄົນຫວຽດນາມນໍາໃຊ້ຂົນສົ່ງຄົນໂດຍສານ ແລະ ຂົນສົ່ງສິນຄ້າ ເຊິ່ງລະເມີດກົດລະບຽບຈະລາຈອນ ແລະ ລະເມີດຕໍ່ກົດໝາຍການຂົນສົ່ງທາງບົກຂອງສອງປະເທດ.
