ວັນທີ 11- 14 ເມສາ 2023 ທີ່ຜ່ານມານີ້ ກົມຕໍາຫຼວດຈະລາຈອນ ກົມໃຫຍ່ຕໍາຫຼວດ ກະຊວງປ້ອງກັນຄວາມສະຫງົບ ສົບທົບກັບ ກົມຂົນສົ່ງ ກະຊວງໂຍທາທິການ ແລະ ຂົນສົ່ງ ສືບຕໍ່ລົງຊຸກຍູ້ເຈົ້າໜ້າທີ່ຕຳຫຼວດ ວຽກງານປ້ອງກັນ, ສະກັດກັ້ນອຸບປະຕິເຫດຈະລາຈອນທາງບົກໃນ ໄລຍະສະເຫຼີມ – ສະຫຼອງ ສົ່ງທ້າຍປີເກົ່າ-ຕ້ອນຮັບປີໃໝ່ ລາວ ພສ 2566 ເປັນກຽດນຳທີມໂດຍ ທ່ານ ພັອ ກົງສີ ສຸວັນນະຕຸ້ມ ຫົວໜ້າກົມຕຳຫຼວດຈະລາຈອນ ແລະ ທ່ານ ບຸນຍະວັດ ນິລະໄຊ ຮອງຫົວໜ້າກົມຂົນສົ່ງ ໄດ້ລົງຢ້ຽມຢາມ ແລະ ໃຫ້ທິດຊີ້ນຳວຽກງານຕົວຈິງໃນຄັ້ງນີ້ອີກດ້ວຍ.
ໂດຍການລົງໄປຊຸກຍູ້ໃນຄັ້ງນີ້ຍັງໄດ້ນໍາເອົາໝວກກັນກະທົບ, ຖົງກັນນ້ຳທີລະລຶກ ແລະ ນໍ້າດື່ມມາມອບໃຫ້ ເຈົ້າໜ້າທີ່ຕຳຫຼວດຈະລາຈອນ ປະຈຳຈຸດກວດກາ ເພື່ອນຳໄປຈັດກິດຈະກຳແຈກຢາຍໃຫ້ນັກຂັບຂີ່ທີ່ສັນຈອນໄປ-ມາຕາມເສັ້ນທາງເລກທີ 13 ໃຕ້.
ລວມມີ 03 ແຂວງຄື: ແຂວງບໍລິຄຳໄຊ ມີ ຢູ່ 02 ຈຸດກວດກາ ເສັ້ນທາງເລກທີ 13 ໃຕ້, ຈຸດບ້ານທວຍ ຕະຫຼອດ 24 ຊົ່ວໂມງ ແລະ ບ້ານແກ້ງສະດອກ ( ຊົ່ວຄາວ ), ແຂວງຄຳມ່ວນ ມີຈຸດກວດກາຕາມເສັ້ນທາງເລກທີ 13 ໃຕ້ ( ຊົ່ວຄາວ ), ແຂວງສະຫວັນນະເຂດ ມີ 02 ຈຸດກວດກາຕາມເສັ້ນທາງເລກທີ 09 ແລະ ເສັ້ນທາງເລກທີ 13 ໃຕ້ ( ຊົ່ວຄາວ ).
ຜ່ານການກວດກາຕົວຈິງກັບທ້ອງຖີ່ນແມ່ນມີຄວາມກຽມພ້ອມ, ກວດກາເປົ້າໝາຍ ຍານພາຫະນະເດີນທາງກັບບ້ານແລະ ໄປທ່ອງທ່ຽວ, ການກວດກາ ແມ່ນຖືເອົາວຽກງານສືກສາອົບຮົມເປັນຫຼັກ ແລະ ສະກັດກັ້ນຫຼຸດຜ່ອນຄວາມໄວ ເພື່ອຮັບປະກັນໄດ້ຄວາມສະຫງົບ, ຄວາມເປັນລະບຽບຮຽບຮ້ອຍ-ປອດໄພ ແລະ ຕາມຮີດຄອງປະເພນີອັນດີງາມຂອງລາວເຮົາ.
ຂ່າວ: ເພັງຕຸລາ.
