ເພື່ອເຮັດໃຫ້ກອງປະຊຸມເຈົ້າໜ້າທີ່ອາວຸໂສຂົນສົ່ງອາຊຽນຄັ້ງທີ 56 ທີ່ນະຄອນຫຼວງພະບາງ ຂຶ້ນໃນລະຫວ່າງວັນທີ 7-8 ພະຈິກ 2023 ທີ່ ໂຮງແຮມພູແມນຫຼວງພະບາງ ໃຫ້ມີຜົນສຳເລັດຕາມຄາດໝາຍ ແລະ ຮັບປະກັນຄວາມປອດໄພ 100%
ກົມຕຳຫຼວດຈະລາຈອນ ໄດ້ຈັດກຳລັງ ສົບທົບກັບພະແນກຕຳຫຼວດຈະລາຈອນ ປກສ ແຂວງຫຼວງພະບາງ ເຂົ້າຮ່ວມປ້ອງກັນ ໃນຄັ້ງນີ້ ຈຳນວນ 73 ສະຫາຍ, ນຳໃຊ້ພາຫະນະທັງໝົດ ຈຳນວນ 17 ຄັນ, ລົດຈັກໂມໂຕເປີດທາງ ຈຳນວນ 16 ຄັນ ແລະ ລົດສະຫຼາມເປີດທາງ ຈຳນວນ 01 ຄັນ.
ກອງປະຊຸມເຈົ້າໜ້າທີ່ອາວຸໂສຂົນສົ່ງອາຊຽນຄັ້ງທີ 56 ແລະ ກອງປະຊຸມປິ່ນອ້ອມ ຫລື 56th STOM ໃນລະຫວ່າງ ວັນທີ 7-8 ພະຈິກ 2023, ທີ່ນະຄອນຫຼວງພະບາງ ໂດຍ ກະຊວງ ໂຍທາທິການ ແລະ ຂົນສົ່ງ, ໄດ້ເປັນເຈົ້າພາບຈັດງານ, ເປັນກຽດເປັນປະທານ ແລະ ກ່າວເປີດໂດຍ ທ່ານ ງາມປະສົງ ເມືອງມະນີ ລັດຖະມົນຕີກະຊວງ ໂຍທາທິການ ແລະ ຂົນສົ່ງ;ມີບັນດາເຈົ້າໜ້າທີ່ອາວຸໂສຂົນສົ່ງອາຊຽນ 10 ປະເທດອາຊຽນ, ຕີມໍແລັດສເຕ ແລະ ບັນດາປະເທດຄູ່ຮ່ວມມືກັບອາຊຽນ ເຊັ່ນ: ສປ ຈີນ, ສ.ເກົາຫຼີ, ຍີ່ປຸ່ນ ແລະ ສະຫະພາບເອີຣົບ.
ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອປຶກສາຫາລື, ທົບທວນ ແລະ ຮັບຮອງບັນຫາຕ່າງໆຈາກກອງປະຊຸມ ເຈົ້າໜ້າທີ່ອາວຸດໂສຂົນສົ່ງອາຊຽນ ຄັ້ງທີ 55 ທີ່ຈັດຂື້ນໃນລະຫວ່າງ ວັນທີ 6-7 ມີຖຸນາ 2023 ທີ່ນະຄອນຫຼວງວຽງຈັນ, ໂດຍມີບັນດາໜ້າວຽກດັ່ງລຸ່ມນີ້: ທົບທວນການຈັດຕັ້ງປະຕິບັດບັນດາໜ້າວຽກ, ກິດຈະກໍາ ແລະ ແຜນງານຕ່າງໆທີ່ໄດ້ຕົກລົງກັນໃນກອງປະຊຸມລັດຖະມົນຕີຂົນສົ່ງອາຊຽນຄັ້ງທີ່ 28 ແລະ ກອງປະຊຸມປິ່ນອ້ອມຕ່າງໆທີ່ໄດ້ຈັດຂື້ນຢູ່ ບາລີ ປະເທດອີນໂດເນເຊຍໃນ ປີ 2022 ທີ່ຜ່ານມາ; ລາຍງານຄວາມຄືບໜ້າການຈັດຕັ້ງແຜນງານ 2022-2023 ພາຍໃຕ້ແຜນຍຸດທະສາດຂົນສົ່ງອາຊຽນ 2016-2025 ແລະ ທົບທວນທ້າຍສະໄໝຂອງແຜນຍຸດທະສາດສະບັບປັດຈຸບັນ
ເພື່ອຮ່າງຍຸດທະສາດສະບັບຕໍ່ໄປ; ຕິດຕາມຜົນກອງປະຊຸມຂອງ 4 ໜ່ວຍງານທີ່ຢູ່ໃນແຜນຍຸດທະສາດການຂົນສົ່ງອາຊຽນຄື: ໜ່ວຍງານການຂົນສົ່ງທາງອາກາດ, ຂົນສົ່ງທາງບົກ, ການຂົນສົ່ງທາງທະເລ, ການຂົນສົ່ງແບບຍືນຍົງ ແລະ ໜ່ວຍງານການອໍານວຍຄວາມສະດວກດ້ານການຂົນສົ່ງ; ກະກຽມເອກະສານຕ່າງໆທີ່ຈະສະເໜີຮັບຮອງໃນກອງປະຊຸມລັດຖະມົນຕີຂົນສົ່ງອາຊຽນ ຄັ້ງທີ່ 29 ທີ່ ສປປ ລາວ ເປັນເຈົ້າພາບ ພ້ອມທັງໄດ້ເຊີນປະເທດ ຕີມໍ ແລັດສະເຕ ເຂົ້າເປັນຜູ້ສັງເກດການໃນກອງປະຊຸມລະດັບວິຊາການ, ລະດັບ ໜ່ວຍງານ ແລະ ລະດັບອື່ນໆຂອງຂະແໜງການຂົນສົ່ງ.
ພາບ: ວັນນະເລດ.
ຂ່າວ: ເພັງຕຸລາ.
